Često kupimo više nego što nam treba: Uz ove trikove hljeb će dugo ostati svjež

14.06.2023. | 20:45

Prema nekim procjenama i do 30 odsto hrane koju kupimo propadne i bacimo je, a jedna od najčešćih namirnica čiji se višak nađe u kanti je – hljeb.

Ne možemo bez njega, pa često kupimo i više nego što je potrebno, a ako ga ne čuvate pravilno, za tri dana može postati pretvrd, ili početi da miriše na kvasac, zbog čega je nejestiv.

Mnogi ga drže u plastičnim kesama. Iako to nije dobar izbor ako želite da poštujete ekološke standarde, to može biti donekle prihvatljivo rješenje, ali samo pod uslovom da u vrećicu ne može ući vlaga, te da hljeb sam po sebi nije previše vlažan.

Naime, u plastičnoj kesi ne postoji nikakav protok vazduha, pa će se u slučaju da ima vlage prije razviti plijesan, odnosno hljeb će se prije pokvariti.

Evo kako bi ga trebalo čuvati da vam potraje:

U dobro zatvorenoj limenci

Bilo kakva kutija kod koje postoji mogućnost da se hermetički zatvori biće dobro rješenje. Bitno je da u nju ne ulazi previše vazduha, jer će se hljeb sušiti, a da ga ipak malo ima, kako bi ga držao svježim.

Platnena vrećica za hljeb

Kutija ponekad možda nije praktična, pa je drugo dobro rješenje platnena vrećica za hljeb. Danas ih relativno jeftino možete kupiti, ali jednostavno ih je i napraviti od platna.

Bitno je samo da na kraju koji ostaje otvoren provučete uzicu, uz pomoć koje vrećicu možete čvrsto zatvoriti.

Drvena kutija za hljeb

To je odlično rješenje, a može biti i zgodan ukras u kuhinji. Ali, imajte na umu – ako nije riječ o kutiji koja se hermetički može zatvoriti, hljeb ipak prvo stavite u platnenu vrećicu, pa tek onda u kutiju, prenosi 24sata.hr.

Papirna kesa za tost

Tvrdi i suvi tost možete čuvati u papirnatoj kesi, ili u plastičnom omotu u kojem ste ga kupili u prodavnici. Kad jednom otvorite kesu, vodite računa da je nakon što izvadite hljeb koji vam treba, opet dobro zamotate, da ne ulazi vazduh.

Peti dan – u rernu

Ako imate hljeb koji stoji već neko vrijeme i izgubio je teksturu, stavite ga u zagrijanu rernu na nekoliko minuta i povratiće ukus i izgled.

Rerna će “izvući” vlagu iz njega. Ali, zagrijavajte ga neposredno prije nego što ćete napraviti sendvič i ono što tad eventualno niste pojeli – bacite, savjetuju na portalu 1milionwomen.