Čokoladna božićna salama sa orasima: Specijalitet koji se sprema za tili čas

18.12.2022. | 07:15

Kolači su nezaobilazni na svakoj prazničnoj trpezi, a naš prijedlog je božićna čokoladna salama sa orasima ili kikirikijem.

Praznici su doba godine koje većina ljudi najviše vole. Ne samo što je napolju idilično jer pada snijeg i cijeli grad je okićen, nego novogodišnja euforija dolazi i iz doma.

Kićenje jelke i dekoracija doma se podrazumijeva, a ono čemu se svi raduju je dobra klopa i druženje sa prijateljima za Božić i Novu godinu. Nakon slanih specijaliteta, na red dolaze kolači kojima rijetko ko može da odoli. Za Božić poslužite predivnu čokoladnu salamu sa orasima koja se pravi od samo 4 sastojka.

Sastojci:

200 g kikirikija ili oraha

380 g kondenzovanog mlijeka

100 g čokolade

20 g putera

Priprema:

Propržite kikiriki ili orahe. U šerpi istopite kondenzovano mlijeko i čokoladu, pa kada se sastojci sjedine dodajte puter. Miješajte dok se lijepo ne istopi. Isključite šporet i dodajte kikiriki ili orahe, a zatim sipajte smjesu na pek papir i špatulom što bolje oblikujte valjak. Lijepo urolajte i stavite u zamrzivač da se stegne. Izvadite i služite.