Megan Foks zabrinuta: Sina joj zlostavljaju zato što nosi haljine

30.04.2022. | 15:56

Glumica Megan Foks rasplakala se u nedavnom intervjuu za “Glamour UK” dok je pričala kako njenog najstarijeg sina Nou zlostavljaju u školi.

Kako kaže majka trojice sinova, srce joj slama okrutnost klinaca s kojima njen sin dijeli školske klupe.

“Imam dijete koje pati. Jako se brinem zbog toga, voljela bih da čovječanstvo nije takvo”, rekla je Megan o devetogodišnjem sinu.

Glumica je i ranije otvoreno govorila o tome da njen sin voli da nosi haljine.

“Još kad je imao samo dvije godine, bile su mu draže od pantalona”, tvrdi Megan.

U međuvremenu je, kako je rekla za “Glamour”, pročitala mnogo knjiga na tu temu, među kojima su i one koje su napisala transrodna djeca.

Izbor odjeće kod svog sina vidi kao njegov način da se izrazi.

“Neke od knjiga poručuju da možete biti dječak i nositi haljinu. Možete se izraziti kroz svoju odjeću kako god želite. To čak ne mora imati nikakve veze s vašom seksualnošću”, rekla je.

Dodala je da je godinama radila na tome da podstakne Nou i njegovu braću, da prihvate ono što jesu. Nažalost, kaže, drugi ljudi su ti koji imaju problema sa ličnim izborima njenog sina.

Istakla je da joj činjenica da zbog posla mora puno da putuje i ostavlja sinove slama srce.

“Voljela bih da mogu da ih povedem sa sobom, to bi olakšalo stvari. Teško mi je, ne samo zbog pritisaka društva, nego i zato što sam odvojena od njih”, dodala je.