Uspješan političar indijskog porijekla: Ko je novi britanski premijer Riši Sunak?

24.10.2022. | 17:40

Bivši ministar finansija i konzervativni zastupnik Riši Sunak spreman je postati britanski premijer nakon što su se bivši premijer Boris Džonson i Peni Mordant povukli iz trke. Sunak će biti prvi britanski premijer indijskog porijekla.

Riši Sunak sin je majke farmaceutkinje i oca doktora opšte prakse Nacionalne zdravstvene službe (NHS). Rođen je u Sautemptonu, a njegovi djed i baka su iz Pandžaba – emigrirali su iz istočne Afrike 1960-ih.

Nakon što je diplomirao na Oksfordu, Sunak je otišao na Stenford kao vlasnik Fulbrajtova stipendije. Na Stenfordu je upoznao svoju suprugu Akšatu Murti, kćer osnivača “Infosysa”, Narajana Murtija. Par se vjenčao 2009. i imaju dvoje djece – Krišnu i Anušku.

Sunak je radio u kompanijama kao što su Goldman Sachs, The Children's Investment Fund Management i Theleme Partners. Takođe je radio za Catamaran Ventures, investicionu kompaniju u vlasništvu njegovog tasta.

Sunak je 2015. postao član parlamenta iz Ričmonda u Jorkširu. Sunak se brzo popeo kroz redove u Konzervativnoj stranci.

Zagovornik Bregzita, Sunak je bio među pristalicama Borisa Džonsona u njegovoj kampanji za “napuštanje EU”. U februaru 2020. godine Sunak je imenovan kancelarom državne blagajne.

Iako je bio naširoko cijenjen zbog svog ekonomskog paketa podrške zaposlenima i kompanijama tokom pandemije Kovida-19, kritikovali su ga jer nije pružio dovoljnu podršku za troškove života domaćinstavam, prenosi The Week.