Amerikanke osvojile sedmo uzastopno zlato u košarci

Ženska košarkaška reprezentacija Sjedinjenih Američkih Država osvojila je zlatnu medalju na Olimpijskim igrama u Tokiju, pošto je u finalu pobijedila Japan sa 90:75 (23:14, 27:25, 25:17, 15:19).

Amerikanke su tako stigle i do sedmog uzastopnog olimpijskog zlata i produžile pobjednički niz na Olimpijskim igrama na 55 utakmica. Takodje, Sju Bird i Dajana Taurazi ušle su u istoriju kao osvajačice pet zlatnih medalja.

Ženskoj košarkaškoj reprezentaciji Japana ovo je prva olimpijska medalja.

Selekciju SAD je do pobjede u današnjem finalu vodila Britni Grajner sa 30 poena, 19 je dodala Aja Vilson, dok je Brijana Stjuart postigla 14 poena.

U timu Japana najbolje su bile Maki Takada sa 17 i Mako Matohaši sa 16 poena.

Bronzanu medalju osvojila je reprezentacija Francuske, koja je u subotu u meču za treće mjesto pobijedila Srbiju sa 91:76.

 

 

Ostavite komentar: